Bygge sjølv utan fagfolk

Før du sender byggesøknad må du kontrollere om du kan gjere det sjølv. Reglane for søknad utan ansvarsrett følger av byggesaksforskrifta SAK10 § 3-1.

Bruk gjerne Direktoratet for byggkvalitet sin trinnvise rettleiar.

For å vite kor mykje du kan bygge på din eigedom må du undersøke planstatus for eigedomen. Du må finne ut om det du skal bygge er i samsvar med føresegner i planen som utnyttingsgrad osv. Gjeldande arealplan for din eigedom kan vere kommuneplanens arealdel og/eller reguleringsplan for området.  

Vi gjer merksam på at du ikkje kan søke om påbygg utan ansvarsrett. Påbygg er byggverk som blir plassert på ein bygning. Som takoppbygg, tak-ark, takterasse, utgraving (underbygging) og liknande. 

Kor mykje du kan bygge på din eigedom er avhengig av kva grad av utnytting planar tillet, og kor mykje du har bygd frå før. 

Kva arealplan som gjeld for din eigedom finn du på Finn planar

Dersom det er endringar eller bygging som gjer at du får større byggevolum, må du rekne utnyttingsgrada. For å rekne ut dette må du bruke informasjon som byggeteikningar eller måle opp bygningar og konstruksjon på din eigedom. Reglar for å rekne ut grad av utnytting går fram av regjeringa sin rettleiar.

Avstand til nabogrense 

Avstand til nabogrense går fram av plan- og bygningslova eller byggegrenser i arealplan. Dersom ikkje anna er bestemt i plan skal byggverk ha ein avstand frå nabogrensa som minst svara til halve byggverket si høgde, og ikkje under 4 meter.  

Avstanden til grensa vert rekna frå byggverkets fasadeliv. 

Nabosamtykke og mindre tiltak 

Kommunen kan godkjenne at byggverk blir plassert nærare byggegrensa enn nemnd ovanfor, eller i nabogrensa: 

• Når eigar av naboeigedomen har gjeve skriftleg samtykke eller 
• Ved oppføring av frittliggande garasje, uthus og liknande tiltak inntil 50 m2 

For nabosamtykke bruk kommunen sitt skjema. Erklæring om nabosamtykke.

Dispensasjon

Dersom byggearbeidet du skal utføre kjem i strid med plan- og bygningslova og tilhøyrande forskrifter eller arealplan, må du søke om dispensasjon. Du kan søke om dispensasjon som ein eigen søknad eller saman med søknad om byggeløyve. 

Dispensasjon skal bli nabovarsla, og vi oppmodar at du søker om dispensasjon saman med søknad om løyve dersom det er aktuelt. For å søke om dispensasjon sjå "Dispensasjon".  

Leidningar eller røyr i grunnen 

Du må sjølv sjå til om det er leidningar eller andre røyr i grunnen der du skal bygge. Dette er for å ikkje gjere skade på dei, og hindre tilgangen ved framtidig reparasjon og vedlikehald.

Dersom du vil bygge ein garasje, tilbygg eller andre mindre tiltak i LNF område må du som regel søke om dispensasjon. Årsaka er at i LNF område er det berre tillate med tiltak som er meint for gardsbasert næringsverksemd. Om du då har ein bustadeigedom som ligg i LNF, er ikkje garasjen eller tilbygget meint som eit landbrukstiltak.

Om eigedomen er brukt og meint for heilårsbustad, kan du søke om dispensasjon samstundes med byggesøknaden. Det vil vere kurrant å få dispensasjon for bygging av mindre tilbygg og garasje på slike eigedomar. Det er ein føresetnad at det ikkje kjem i konflikt med dyrka mark eller andre landbruksinteresser.

Vi vil då handsame dispensasjonen samstundes med byggesøknaden, og du vil bli fakturert for medgått tid. Handsaming av dispensasjonen vil med det bli langt rimelegare enn i andre saker.

For informasjon om korleis du skal sende byggesøknad (Link)

Enkelt samandrag av kva søknad skal innehalde

For å handsame søknad treng vi følgjande:

• Teikningar (plan-, snitt- og fasadeteikning)
• Situasjonsplan 
• Eit følgeskriv som skildrar kva du skal bygge
• 5153 Søknad om løyve til tiltak utan ansvarsrett
• 5155 Opplysningar gjeve i nabovarsel
• 5156 Kvittering for nabovarsel

For å nabovarsle kan du bruke eige skjema:

• 5154 Nabovarsel
• Teikningar og situasjonsplan må du og levere til naboen din

Du må søke om ferdigattest når du er ferdig å bygge:

• 5167 Søknad om ferdigattest

Dersom du må søke om dispensasjon sjå Dispensasjon for korleis du skal gå fram. Du kan søke om dispensasjon samstundes som du søker om byggeløyve. 

Dersom du skal bygge eller føre opp noko som krev søknad og løyve, må du varsle dine naboar og gjenbuarar.

Naboar er dei som bur på eigedom som grensar til di tomt. Gjenbuar er dei som bur på eigedom som er skilt frå din eigedom med veg, elv, eller anna areal. 

Frist for naboar og gjenbuar til å kome med merknad til nabovarsel er to veker. Du må då vente 14 dagar frå du varsla naboar til du sender inn byggesøknad til oss. Dersom naboar har gjeve skriftleg samtykke til tiltaket kan du sende søknaden med ein gong.

Bestill naboliste frå tenestetorget 
Bruk skjema for Nabovarsel
Les direktoratet si rettleiing for nabovarsel

Søknadsblankettar finn du på direktoratet - søknadsskjema for byggesak

For søknad treng vi 

• Skjema for "Søknad om løyve til tiltak utan ansvarsrett"
• Skjema for "Opplysningar gjeve i nabovarsel"
• Skjema for "Kvittering for nabovarsel"
• Målsett situasjonsplan (kart) med koordinatar og/eller avstandar frå eigedomsgrenser, anna bygning, veg, elv osv.
• Situasjonsplanen skal vere i målestokk 1:500 eller1:1000. Den skal tydeleg vise storleiken og kvar byggetiltaket skal bli plassert
• Målsette teikningar som viser byggetiltaket i riktig målestokk 1:100. Dersom det er eit tilbygg skal vi ha teikning både før og etter. Det må gå tydeleg fram kva du skal bygge. Romskildring må gå fram
• Plan-, snitt- og fasadeteikning 
• Eventuelle uttale frå andre myndigheiter om for eksempel avstand til kommunal veg
• Dersom arbeidet krev dispensasjon må du sende ei eiga grunngjeving. Sjå "Dispensasjon"
• Eit følgeskriv som skildrar kva du skal bygge og kva du har tenkt 
• Eventuelle merknadar frå naboar med ei forklaring på korleis du har tatt omsyn til dei

Søknaden kan bli avvist, og du kan bli fakturert dersom den har manglar som: 

• Manglar eigedomsinformasjon, ufullstendige teikningar
• Manglar disensasjon eller søknad om dispensasjon der det er naudsynt
• Manglar nabovarsling
• Søknaden er innsendt før fristen for nabomerknad er utgått (to veker) 
• Tiltaket er i strid med føresegner gjeve i plan- og bygningslova

Søknaden kan du sende skriftleg til kommunen på forskjellige måtar. Vi oppmodar om at du delar søknaden opp i vedlegg med nummerering. Det kan bidra til raskare handsaming av din byggesøknad.

Du kan bruke digitale løysingar for å lage og sende søknad. Bruk digitale løysingar

Søknaden kan du sende på e-post til postmottak@hyllestad.kommune.no 

Du kan møte opp på Kommunehuset ved tenestetorget og levere søknaden.

Du kan søknaden i brevform til:
Hyllestad kommune
Lifjordvegen 7
6957 HYLLESTAD

Du må betale gebyr etter prisboka for handsaming av din søknad. Vi sender faktura etter at saka er handsama.

Sjå prisboka til Hyllestad kommune  (PDF, 4 MB)

• Dersom du må søke om fleire dispensasjonar bør du søke om det samla i ein søknad. Du kan då få billegare gebyr
• Dersom vi må avslå søknaden fordi den manglar opplysningar, kan du bli fakturert etter prisboka

Frå kommunen mottar søknad "utan ansvarsrett" har vi 3 veker frist for handsamingstid. Dette gjeld frå komplett søknad utan noko merknad frå nabo. Det betyr at søknaden må vere utan manglar, og i samsvar med plan- og bygningslova med forskrifter. 

Dersom det krev dispensasjon er handsamingstida 12 veker. Dersom søknaden må på høyring til offentleg myndigheiter er tida 12 veker + den tida søknaden ligg til høyring (maksimalt 4 veker). 

Du må betale gebyr for handsaming av søknaden etter prisboka.

Når bygget er ferdig må du søke om ferdigattest. Alle tiltak som er søknadspliktige skal avsluttast med ferdigattest.

Det er ikkje lov å ta i bruk det du har bygd før kommunen har gjeve ferdigattest eller mellombels bruksløyve. 

For søknad om ferdigattest bruk skjema Søknad om ferdigattest 

Ferdigattest blir gjeve på bakgrunn av innsendt dokumentasjon, og er kommunen si avslutning på byggesaka.