Stig Roger Eide
Sognefjorden treng deg!
Torsdag 4. september går den store ryddedugnaden Rein Sognefjord av stabelen – eit felles løft for å fjerne plast og boss frå fjord og strand. I fjor vart det samla inn heile 13 tonn plast, og Hyllestad bidrog med 1300 kg. No satsar vi på å slå rekorden - klarar vi å rydde meir enn 1300 kg i år?
Alle kan bidra – og alle monnar dreg!
Ta med familien, kollegaer eller vennar og rydd ei strand, eit nes eller eit fjøreområde. Alle kan vere med på Rein Sognefjord! Anten du er ein enkeltperson eller ein del av ei gruppe, skal det vere mogleg for deg å bidra i nærleiken av der du held til.
Du ta med deg kollegaer ut å rydde i lunsjen, ta med deg familien på tur i ditt nærområde eller bli med på kommunen si offentlege ryddedugnad. Har du ikkje tid akkurat 4. september? Rydd når du kan – kvar plastbit du fjernar, gjer ein forskjell.
Om du er usikker kvar du skal rydde, kan du finne registrerte avfallsområde i kommunen på ryddenorge.no. Har du informasjon om eit område som er forsøpla, kan det òg registrerast her!
Kvifor ryddar vi?
Her er fem gode grunnar:
1. 15 tonn plast hamnar i havet kvart minutt – og blir til mikroplast som aldri forsvinn.
2. Millionar av sjøfuglar og sjødyr døyr årleg på grunn av plast.
3. Om 25 år kan det vere meir plast enn fisk i havet – om vi ikkje handlar no.
4. Plast øydelegg naturopplevinga – fjorden er vakrast utan boss.
5. Rydding nytter! Innsatsen vår gir synlege resultat og tryggare leveområde for dyra.
Praktisk info for Hyllestad:
Stiftinga Framtidshavet er hovudarrangør og har sendt ut hanskar og bossekkar til kommunane langs Sognefjorden – og sørga for containerar til innsamla avfall.
Utstyr:
- Hanskar og bossekkar kan hentast hjå frivilligsentralen på kommunehuset i Lifjordvegen 7 , Hyllestad.
Containerar:
- To containerar vert plassert ut og er tilgjengelege heile veke 36.
·
Avfallshandtering:
Etter dugnaden/ryddinga må alt boss leverast i riktig container, så innsatsen vert registrert - anten på Sørbøvåg eller i Leirvik.
Har du utfordringar med transport? Ta kontakt med Kåre Olav Hatlebrekke på telefon: 91 35 61 49 i kommunen – vi finn ei løysing. Det viktigaste er at bosset ikkje blir liggande att i naturen!
Lokalt engasjement for reinare fjord: offentleg ryddeaksjon og pizzakveld
I år som i fjor inviterer kommunen til ein offentleg ryddeaksjon! Her kan alle som vil møte opp for å hjelpe til å fjerne boss frå fjord og strand. Tidspunkt for aksjonen er 4.september med oppmøte kl. 16:00 ved Rysjedalsvika ferjekai. Ryddinga varer fram til kl. 18:00, og det er høve til å delta uansett kor lenge ein har tid. Vi kjem til å rydde langs fjorden utover mot Nesje Fort. Kle dykk etter vêret.
Ryddeleiar Linnéa Holsen Meier stiller med hanskar og bossekkar til alle som kjem, og sørger for transport av bosset som vert samla inn. Dersom nokon har tilgang til større bil og ønskjer å bidra med frakt av boss til container, er det ekstra velkoment. Dei som har hanskar frå tidlegare aksjonar vert oppmoda til å ta med desse, då dei er laga for gjenbruk.
Etter ryddeaksjonen vert det sosialt samvær med pizza på Hotel Sognefjord kl. 18:15–20:00. Inngangsbilletten til arrangementet er eit bilete som viser at ein har delteke i ryddinga – anten om det er gjennom ovannemnd ryddeaksjon eller på eige initiativ. Hugs at bosset må leverast i ein av dei to utplasserte containerane – det er sånn vi vår målt kor mykje vi får rydda i Hyllestad! Påmelding via Facebook vert oppmoda, slik at vi kan berekne riktig mengde mat og redusere matsvinn.
Vel møtt til ein innsats som gjer ein forskjell – både for naturen og nærmiljøet.
Spørsmål?
Ta kontakt Linnéa Holsen Meier.
Du når ho på telefon 949 76 285.
På e-post: Linnea.Holsen.Meier@hyllestad.kommune.no
Meir informasjon om Rein Sognefjord 2025 finn du her!