Feiing og tilsyn
Kommunen har ansvar for feiing og å føre tilsyn med fyringsanlegg.
Kommunen skal syte for at det vert ført tilsyn, med at fyringsanlegget for oppvarming av rom og bygningar er intakt, fungerer som forutsatt og ikkje forårsakar brann eller annan skade, etter behov og minst ein gong kvart fjerde år.
Varsel om feiing eller tilsyn
Varsel om feiing eller tilsyn vert i stor grad sendt ut som tekstmelding via Varsling 24 nokre dagar før. Dersom ikkje tidspunktet høver, kan du avtale nytt tidspunkt med feiaren.
Lurer du på om ditt telefonnummer er knytt til denne tenesta, så kan du sjekke dette, og eventuelt endre oppføringa via varslemeg.no
Sikker tilkomst
Det er eigar av hus/bygg sitt ansvar å sørge for sikker tilkomst til og på tak. Er feiaren avhengig av laus stige for å kome til taket, skal eigaren sørge for at det er eigna stige på lett tilgjengeleg stad.
Før feiaren kjem skal du
- Legge fram stige (for dei med takfeiing).
- Sikre at stigen ikkje kan skli.
- Sjekke at takstige og andre innretningar er i forsvarleg stand og i samsvar med regelverket.
- Parafin-/oljebrennar skal vere sløkt og avstengd (for dei som har det).
- Stenge luker, ventilar og spjeld.
- Hugse å seie frå til eventuell leigebuar.
- Passe på at ikkje noko anna kan vere til hinder for feiinga.
Dersom det ikkje er klargjort for feiing (folk til stades, framlagt stige eller på anna måte gjeve klar melding om at det kan feiast), vil det ikkje bli feia. Du kan ikkje rekne med ny feiing før neste runde dersom det ikkje blir gjort ny avtale medan feiaren er i området. Ta difor kontakt med feiaren så snart som mogleg.
Tilsyn
Eigar eller representant for eigar skal vere til stades og sørge for at samtlege bueningar, eldstader og skorsteinar er tilgjengeleg. Om nødvendig må eigar eller eigar sin representant varsle andre brukarar (leigetakarar).
Tilsynet vil omfatte kontroll av
- Eventuelt tidlegare avvik eller merknader er følgt opp og utbetra.
- Ny eldstad eller vesentlege endringar ved fyringsanlegget er meldt inn til kommunen.
- Anlegget er tilfredstillande kontrollert, ettersett og vedlikehalde.
- At røykvarslarar, handslukkeutstyr og rømmingsveg følgjer regelverket.
Har huseigar informasjon til feiarvesenet som har betyding for tilsynet ber vi om at dette blir lagt fram til oss når vi kjem. Dette kan til dømes vere monteringsanvisning til omn eller liknande.
Spør om ID-kort dersom du er usikker om det er feiaren som kjem på døra.
Feiing gjeld heilårsbustader og fritidsbustader
Tenesta gjeld heilårsbustader og fritidsbustader, etter forskrift om brannforebygging.
Lover og forskrifter
Bål og grilling
Det er alltid den som brenn bål som har ansvaret for brannsikkerheita. Bålet må ikkje vere større enn at du har kontroll på det og kan sløkke ved behov. Det er forbode å brenne plast, bygningsmateriale og anna søppel.
Bålforbod 15. april – 15. september
Om våren og sommaren blir det gjerne tørt. Då aukar faren for skog-, gras- og lyngbrann. Sjølv eit lite kaffibål eller eit lite grillbål kan vere nok til å sette fyr i marka rundt og føre til brennspreiing. I Norge er det difor bålforbod frå 15. april til 15. september. I denne perioden er det forbod å tenne opp bål i eller i nærleiken av skog og anna utmark utan løyve frå kommunen.
Alle plikter å vise aktsemd ved gjennomføring av aktivitet som kan føre til brann.
Nokre hugsereglar ved bruk av eingongsgrill
- Ta med flaske som kan brukast til sløkkevatn om elden spreier seg til terreng.
- Ikkje bruk eingongsgrill der det ikkje er nær tilgang til vatn.
- Ta omsyn til skogbrannfare og vind.
- Plasser grillen på underlag som ikkje er brennbart.
- Drukn gjerne grillen i vatn når grillinga er over, eller bruk godt med vatn for å kjøle den.
- Ikkje forlat grillen ute i naturen. Kast grillen i søppelspann som er laga for grill og kull, eller vent eit par døgn med å kaste den i bosset slik at du er sikker på at grillen er kald.
Unntak frå bålforbodet
- Du kan tenne opp bål dersom elden heilt openbart ikkje kan spreie seg. Det kan vere at det til dømes har vore mykje nedbør over lang tid.
- Du kan grille på tilrettelagte grill- og bålplassar med ubrennbart underlag.
- Du kan grille i din eigen hage.
- Sameige/burettslag kan ha eigne retningslinjer.
- Det er tradisjon å brenne jonsokbål i grendene. Vi krev ikkje at du søker om om å brenne jonsokbål, men vil ha melding om stad, tidspunkt og bålansvarleg.
Melding om bålbrenning
Melding om bålbrenning kan sendast til brannsjefen eller postmotta, og skal innehalde informasjon om:
- Dato, tid og stad der brenninga skal foregå
- Kva som skal brennast og evt. i kva omfang
- Kven som er ansvarlig for brenninga, med kontaktinformasjon (tlf.nr)
- Kva tryggleikstiltak som er planlagt
Fyrverkeri
Nyttårsafta er det tillatt å skyte opp fyrverkeri klokka 18.00–02.00 utan å søke på førehand.
Sal av fyrverkeri
Alle utsal skal vere godkjent av brannvesenet i god tid før salstidspunktet. Søknaden skal leverast skriftleg innan 1.mai i salsåret.Utsalsstaden skal vere knytt til ein fast butikk, og skal stette krav til lokale for oppbevaring og utsal. Dei ansvarlege skal ha gjennomført kunnskapsprøve frå Norsk Brannvernforening og ha bevis for dette.
Salsperioden er sett til dei to siste ordinære handelsdagane før nyttårsafta.
Oppskyting utanom nyttårsafta
Dersom du ønsker å skyte opp fyrverkeri utanom nyttårsafta, til dømes i samband med feiring av bursdagar eller skuleball, må du søke politiet om løyve til oppskyting av fyrverkeri. Avgjerda om å gi løyve er eit vedtak som du kan klage på, difor får du brevet skriftleg per post eller e-post.
Politiet stiller som regel desse vilkåra til løyvet
- Starttidspunktet bør seinast vere klokka 22.45. Det skal vere normal nattero klokka 23.00.
- Arrangøren skal så langt det let seg gjere kunngjere oppskytinga i nærmiljøet, media (aviser eller radio), slik at ålmenta (dyreeigarar) kan ta sine førehandsreglar.
Du må ta omsyn til dette når du skal bruke fyrverkeri
- Vêr- og vindtilhøve.
- Generell brannfare.
- Oppskyting skal føregå på ein open plass, i trygg avstand frå bygningar og bilar.
- Sjekk at fyrverkeriet ikkje er skadd og hugs verneutstyr.
- Fyrverkeri skal ikkje handterast av born eller rusa personar.
- Dersom ikkje fyrverkeriet går av skal du ikkje prøve å tenne det på nytt, men la det stå i minst 20 minutter og så sette det vekk. Blindgjengarar skal leverast tilbake til utsalsstaden.
Japanske og kinesiske lykter
Japanske og kinesiske lykter vert brukt stadig oftare i samband med markeringsdagar og på nyttårsafta. Desse lyktene har open eld som skal gje varme i lykta. Du har ikkje kontroll på kor ei slik lykt landar. Det kan fort vere i vedstabelen til naboen, på eit torvtak eller i småskogen rundt bustadfeltet. Lyktene må derfor brukast med aktsemd når brannfaren er stor.
Oppbevaring av fyrverkeri
Fyrverkeri skal oppbevarast tørt og i romtemperatur. Overskot etter nyttårsafta kan ikkje leverast tilbake til utsalsstad dersom det er heilt og kan brukast. Pass då på god lagring til neste sesong.
Meld inn skorstein og eldstad
Du treng ikkje søke til kommunen om å skifte ut eldstaden din, men for å sikre at feiaren har oversikt over fyringsanlegga er det viktig at du melder endringar.
Meld frå om skifte av eldstad
Når du har montert ny eldstad lyt du melde i frå til kommunen. Her finn du skjema for å melde i frå om skifte av eldstad.
Skjema for melding om skifte av eldstad (PDF, 174 kB)
Fyll ut skjema og send til:
Hyllestad kommune, Lifjordvegen 7, 6957 Hyllestad
E-post: postmottak@hyllestad.kommune.no
Det er eigar som har ansvaret for å melde dette til oss, sjølv om du kanskje har hatt firma til å utføre jobben. Hugs at dersom du fjernar ein eldstad og ikkje monterar ny, må hol etter røykrør tettast på forsvarleg måte for å ivareta brannsikkerheita.
Feiaren kan gi pålegg om retting
Det er ingen formelle krav til dei som monterer eldstad, men vi oppmodar alle til å bruke kyndige fagfolk. Feiaren skal under feiing og tilsyn vurdere tilhøve ved fyringsanlegg og har mynde til å gje pålegg om retting der det er nødvendig.
Skorstein
Skal du føre opp ny eller rehabilitere eldre skorstein? Hugs at dette er søknadspliktig, med krav om ansvarlege føretak.
Har du spørsmål ta kontakt med feiaren
Feiar, Morten Flaterås, tlf: 48 15 11 60
Forskrifter knytt til feiing og tilsyn
Forskrift om lovfesta feiing og tilsyn av fyringsanlegg og gebyr for feiing og tilsyn av fyringsanlegg
Forskrift om brannforebygging