Lovdata: Forskrift om permisjon frå pliktig grunnskuleopplæring, Hyllestad kommune §§ 5 - 7.
§ 5. Søknad om permisjon
Elevar på Hyllestad skule kan søkje om permisjon i inntil to veker (10 skuledagar). Dersom det vert søkt om fri utover dette må eleven skrivast ut av skulen, og søkje seg inn igjen når eleven er tilbake. Skulen skal vurdere om det er forsvarleg at eleven får godkjent søknad om permisjon. I vurderinga skal det mellom anna leggast vekt på:
- Kva er det beste for eleven, kva meiner eleven sjølv
- Skulen sitt planlagde undervisningsopplegg i perioden det vert søkt for
- Eleven sitt faglege nivå
- Eleven sin fråværsstatistikk
-
Som hovudregel vert det ikkje gitt permisjon i periodar det det vert gjennomført statlege kartleggingsprøver, nasjonale prøver, avgjerande vurderingssituasjonar på ungdomsskulen og eksamenar. Det er ikkje ynskjeleg at det vert søkt om permisjon i oppstart av nytt skuleår.
Føresette har plikt til å sørge for nødvendig opplæring under fråværet slik at eleven kan følgje med på opplæringa på skulen etter fråværet.
§ 6. Permisjon ved heilagdagar
Elevar som høyrer til eit anna trussamfunn enn Den norske kyrkja, har rett til permisjon ved heilagdagar, etter søknad.
§ 7. Om når skulen kan gje permisjon
Når det er forsvarleg, kan skulen godkjenne permisjonar til følgjande arrangement:
- Deltaking i sportslege konkurransar
- Deltaking på kulturelle arrangement/framføringar
- Deltaking på viktige familiehendingar i nær familie
- Deltaking i politisk og/eller frivillig organisasjonsarbeid
Forskrift om permisjon frå pliktig grunnskuleopplæring, Hyllestad kommune